ఆ కార్యాలయాలను కూల్చేస్తాం: మంత్రి కోమటిరెడ్డి వెంకట్ రెడ్డి

 ఆ కార్యాలయాలను కూల్చేస్తాం: మంత్రి కోమటిరెడ్డి వెంకట్ రెడ్డి

             మూడు రోజుల్లోనే కాంగ్రెస్ సర్కారు కీలక నిర్ణయాలతో దూకుడు ప్రదర్శిస్తోంది. ఇప్పటికే సీఎం రేవంత్ రెడ్డి కీలక నిర్ణయాలు తీసుకుంటుండగా.. ఇప్పుడు ఆర్ అండ్ బీ మంత్రిగా బాధ్యతలు స్వీకరించిన కోమటిరెడ్డి వెంకట్ రెడ్డి కూడా కీలక నిర్ణయాలు తీసుకున్నారు. అసెంబ్లీని సుందరీకరించే పనులతో పాటు సీఎల్పీ కార్యాలయాలను కూల్చేస్తామని కోమటిరెడ్డి కీలక వ్యాఖ్యలు చేశారు.

కోమటిరెడ్డి వెంకట్ రెడ్డి

తెలంగాణలో కాంగ్రెస్ ప్రభుత్వం కొలువుదీరి మూడు రోజులవుతున్న వేళ.. రేవంత్ సర్కారు పలు కీలక నిర్ణయాలు తీసుకుంటోంది. ఈ నేపథ్యంలోనే రోడ్లు భవనాల శాఖ మంత్రిగా కోమటిరెడ్డి వెంకట్ రెడ్డి బాధ్యతలు స్వీకరించిన వేళ.. ఆయన కూడా పలు కీలక నిర్ణయాలు తీసుకున్నారు. ఆర్ అండ్ బీ శాఖ అప్పగించినందుకు సీఎం రేవంత్ రెడ్డికి కోమటిరెడ్డి వెంకట్ రెడ్డికి కృతజ్ఞతలు తెలిపారు. ఈ క్రమంలో.. తొమ్మిది ఫైళ్లపై సంతకం చేశారు. అసెంబ్లీ పరిసరాలు సుందరీకరణ చేస్తామని ప్రకటించారు. కాగా.. సీఎల్పీ కార్యాలయానికి కూల్చేస్తామని ప్రకటించారు. వాటి స్థానంలోనే కొత్త భవనాలు నిర్మిస్తామని తెలిపారు. కొత్త కౌన్సిల్‌ భవన నిర్మాణానికి ముఖ్యమంత్రి రేవంత్ రెడ్డి ఆదేశించారని స్పష్టం చేశారు. త్వరలో కొత్త కౌన్సిల్‌ భవన నిర్మాణం చేపడుతామని.. పాత భవనం ఆవరణలోనే ఏర్పాటుకు రాష్ట్ర ప్రభుత్వం నిర్ణయం తీసుకుందని తెలిపారు.

సంతకాలు చేసిన తొమ్మిది ఫైళ్లలో.. నల్గొండ నుంచి ధర్మాపురం, ముషంపల్లి రహదారిని 4 లైన్‌ రోడ్డుగా మార్చటం.. కొడంగల్, దుడ్యాల రహదారి విస్తీర్ణానికి సంబంధించిన దస్త్రాలు ఉన్నాయి. రానున్న రెండు మూడేళ్లలో రహదారుల విస్తీర్ణానికి పూర్తి చర్యలు తీసుకుంటామని కోమటిరెడ్డి వెల్లడించారు. పదేళ్లుగా కేసీఆర్ సర్కార్ రహదారుల అభివృద్ధిపై దృష్టి పెట్టలేదని విమర్శించారు. రోడ్లు, భవనాల శాఖ మంత్రిగా రహదారుల అభివృద్ధికి కృషి చేస్తానని హామీ ఇచ్చారు. రాష్ట్రంలోని 14 రహదారులకు జాతీయ హోదా ఇవ్వాలని కేంద్ర మంత్రి నితిన్‌ గడ్కరీని కలిసి అడుగుతానన్నారు. ఆర్ఆర్ఆర్ సౌత్‌ను జాతీయ రహదారిగా గుర్తించాలని కోరనున్నట్లు తెలిపారు.

చిన్నారులలో నమ్మకం మరియు భద్రతా భావం కలిగించడం ఎలా..!

వీటితో పాటు.. విజయవాడ- హైదరాబాద్ రహదారిని 6 లైన్లకు, హైదరాబాద్- కల్వకుర్తి 4 లైన్‌లకు పెంచటంతో పాటు సెంట్రల్ రోడ్ అండ్ ఇన్‌ఫ్రాస్ట్రక్చర్ ఫండ్ (సీఆర్ఐఎఫ్)ని పెంచాలని అడుగుతానని కోమటిరెడ్డి తెలిపారు. ఈ మేరకు రేపే నితిన్ గడ్కరీని కలవనున్నట్టు తెలిపారు. భువనగిరి ఎంపీ పదవికి కూడా రేపే రాజీనామా చేయనున్నట్టు ప్రకటించారు.