రూ.20 లక్షల వరకు పన్ను తగ్గింపు.. కేంద్రానికి CII కీలక సూచన

 రూ.20 లక్షల వరకు పన్ను తగ్గింపు.. కేంద్రానికి CII కీలక సూచన

Income Tax: దేశంలో వినియోగం పెంచేందుకు మధ్య తరగతి ప్రజలకు మిగులు ఆదాయం ఉండేలా వ్యక్తిగత ఆదాయపు పన్నును తగ్గించాలని పరిశ్రమల సంఘాల ప్రతినిధులు సూచించారు. రూ.20 లక్షల వరకు ఆదాయంపై పన్నులు తగ్గించాలని కోరారు. బడ్జెట్ 2025-26లో ఈ మేరకు నిర్ణయం తీసుకోవాలని తెలిపారు. ప్రభుత్వానికి పరిశ్రమ సంఘాల సూచనలు తెలుసుకుందాం.

Income Tax: మరో రెండు నెలల్లో వార్షిక బడ్జెట్ ప్రవేశపెట్టనుంది కేంద్ర ప్రభుత్వం. ఈ క్రమంలో వివిధ రంగాల ప్రతినిధులతో కేంద్ర ఆర్థిక శాఖ సమావేశమై కీలక సూచనలు తీసుకుంటోంది. ఈ నేపథ్యంలో పరిశ్రమ సంఘాల సమాఖ్య (CII) ప్రతినిధులు కీలక సూచనలు చేశారు. వినియోగం పెంచేందుకు, పేద, మధ్య తరగతి ఆదాయ వర్గాల చేతిలో మిగులు ఆదాయం ఉండేలా చూడాలని కోరారు. అందుకు వ్యక్తిగత ఆదాయపు పన్నును తగ్గించాలని తెలిపారు. వినియోగం మరింత పెరగాలంటే రూ. 20 లక్షల వరకు వార్షిక ఆదాయంపై పన్నులు తక్కువగా ఉండాలన్నారు.

ఉద్యోగాల సృష్టికి అధిక అవకాశం ఉండే జౌళి, పాదరక్షలు, టూరిజం, ఫర్నిచర్ వంటి వివిధ రకాల రంగాలకు ఉద్దీపన చర్యలు ప్రకటించాలని కేంద్ర ఆర్థిక మంత్రి నిర్మలా సీతారామన్‌తో సోమవారం నిర్వహించిన బడ్జెట్ సంప్రదింపుల సమావేశంలో సీఐఐ ప్రతినిధులు కోరారు. 2025- 26 ఆర్థిక సంవత్సరానికి చెందిన వార్షిక బడ్జెట్ ఫిబ్రవరి 1, 2025 రోజున పార్లమెంటులో ఆర్థిక మంత్రి బడ్జెట్ ప్రవేశపెట్టనున్నారు. ఈ నేపథ్యంలో సీఐఐ ప్రతినిధులతో సమావేశమయ్యారు. భారత్ సహా ప్రపంచ దేశాలకు చైనా భారీగా వస్తువులు ఎగుమతి చేస్తోంది. ఈ క్రమంలో సీఐఐ ప్రతినిధులు ఆందోళన వ్యక్తం చేశారు.

  వాతావరణ మార్పులతో ఆహార భద్రత, ద్రవ్యోల్బణానికి ముప్పు ఉందని ఆర్థిక శాఖ ముందుకు సీఐఐ ప్రతినిదులు తీసుకొచ్చారు. భారత ఆర్థిక వ్యవస్థ రాణిస్తున్నా, అంతర్జాతీయంగా పలు సవాళ్లు ఉన్నాయని సీఐఐ ప్రెసిడెంట్ సంజీవ్ పురి తెలిపారు. ఆర్థిక శాఖతో సమావేశం అనంతరం మీడియాతో మాట్లాడారు. చిన్న, మధ్య తరహా పరిశ్రమలకు ఊతమిచ్చే చర్యలు చేపట్టాలని కోరినట్లు ఆయన చెప్పారు. అంతర్జాతీయ సరఫరా వ్యవస్థకు భారత్‌ను అనుసంధానం చేసే విషయంపై ప్రత్యేక దృష్టి సారించాలని కోరినట్లు తెలిపారు. ఈ సమావేశంలో ఆర్థిక మంత్రి నిర్మలా సీతారామన్‌తో పాటు ఆర్థిక శాఖ సెక్రెటరీ, దీపమ్ సెక్రెటరీ, ఫైనాన్షియల్ వ్యవహారాల శాఖ సెక్రెటరీలు, ప్రభుత్వ ముఖ్య ఆర్థిక సలహాదారు పాల్గొన్నారు.