అంతర్జాతీయ యోగ దినోత్సవం :

 అంతర్జాతీయ యోగ దినోత్సవం :

యోగమార్గాన్ని ఒక విజ్ఞానశాస్త్రంగా భారతీయులు అభివృద్ధి చేశారు. దీనికి పునాదులు అయిదువేల సంవత్సరాల క్రితం పతంజలి మహర్షి వేశాడు. అంతకుముందున్న హఠ, క్రియా, రాజయోగాది పద్ధతుల నుంచి సేకరించిన ముఖ్యాంశాలను సూత్రరూపంలోకి పతంజలి మహర్షి సమన్వయం చేశాడు. ఆ యోగసూత్రాలను అభ్యాసపూర్వకంగా అనుభూతిలోకి తెచ్చుకోవాలి. నేటి యాంత్రిక యుగంలో శాంతి కరువవుతోంది. పిన్నలనుండి పెద్దల వరకు అందరూ ఏదో రకంగా మానసిక ఒత్తిడికి గురవుతూనే ఉన్నారు. మానసిక ఆందోళనల నుండి బయటపడాలనే తాపత్రయం అందరికీ ఉంటుంది. సంతోషకర వాతావరణంలో ప్రశాంతంగా గడపడమే కదా ఎవరైనా కోరుకునేది. శాంతస్థితిని సాధించాలంటే ధ్యానమే మంచి సాధనం. నిరంతరం సాధనతో విషయగ్రహణ శక్తి పెరుగుతుంది. తెలుసుకోవాలనే కుతూహలం పెరుగుతుంది. మీలో గ్రహణ శక్తి లేకపోతే మిమ్మల్ని ఎవరూ చేరుకోలేరు. మీరు నిజగురువును చేరలేరు. జీవితం కూడా మిమ్మల్ని చేరుకోలేదు. మీరు ప్రతిదానినీ వదులుకోవాల్సి వస్తుంది. కొత్త విషయాలను గ్రహించాలంటే మీరు శారీరకంగా, మానసికంగా సుముఖంగా ఉండాలి. మీలోని శక్తియుక్తులన్నీ సంసిద్ధమై ఎరుకతో ఉండాలి. ఆ ఎరుక కలిగినప్పుడు దైవం కూడా మిమ్మల్ని చేరుకోవలసిందే.