బిగ్ అలర్ట్.. వచ్చే 4 రోజుల్లో 3 రోజులు బ్యాంకులు బంద్.. పనుంటే ప్లాన్ చేసుకోండి!

 

 Holidays: దేశ ప్రజలకు బిగ్ అలర్ట్.. వచ్చే నాలుగు రోజుల్లో 3 రోజుల పాటు బ్యాంకులు మూత పడనున్నాయి. ఆ ఒక్క రోజు కూడా బ్యాంకుల్లో లావాదేవీలు అంతంత మాత్రమంగానే సాగే అవకాశాలు ఉన్నాయి. అందుకే బ్యాంకులో పనుంటే ముందే ప్లాన్ చేసుకోవడం మంచిది.

Bank Holidays: ప్రస్తుతం ఏ చిన్న ఆర్థిక లావాదేవీ చేయాలన్ని బ్యాంకులో ఖాతా ఉండాల్సిందే. ఏదో ఒక పనిమీద తరుచుగా బ్యాంకుకు వెళ్లాల్సి వస్తుంటుంది. అయితే, బ్యాంక్ కస్టమర్లు ఇక్కడో విషయం గుర్తుంచుకుని ఓ ప్లాన్ ప్రకారం వెళ్తే ఇబ్బందులు ఉండవు. ఎందుకంటే ఈ ఆగస్టు నెలలో మొత్తం 14 రోజుల పాటు బ్యాంకులకు సెలవులు వస్తున్నాయి. అలాగే వచ్చే 4 రోజుల్లో అంటే ఈ శనివారం నుంచి వచ్చే మంగళవారం వరకు 3 రోజులు సెలవులు వస్తున్నాయి. ఈ మూడు రోజుల పాటు బ్యాంకులు మూసే ఉంటాయి. చెక్ ఎన్‌క్యాష్‌మెంట్, డీడీ, క్యాష్ డిపాజిట్, క్యాష్ విత్ డ్రా, కొత్త అకౌంట్ తెరవడం, అకౌంట్ క్లోజ్ చేయడం, లోన్ తీసుకోవడం, రూ. 2 వేల నోట్లను మార్చుకోవడం సహా ఎలాంటి పనులున్న ముందే చూసుకోవడం బెటర్. బ్యాంకులకు ఏ రోజుల్లో సెలవులు ఉన్నాయో ముందే చూసుకోవాలి.

                ఈ వారాంతంలో రెండో శనివారం (ఆగస్టు 12వ తేదీ) వచ్చింది. ఆ రోజు బ్యాంకులు మూసే ఉంటాయి. ఆ తర్వాత ఆదివారం (ఆగస్టు 13వ తేదీ) సాధారణ సెలవు ఉంటుంది. ఆ మరుసటి రోజు సోమవారం (ఆగస్టు 14) న బ్యాంకులు పని చేస్తాయి. అయితే, ఆ తర్వాత మంగళ వారం రోజున స్వాతంత్య్ర దినోత్సవం (ఆగస్టు 15) వస్తోంది. ఆ రోజు కూడా బ్యాంకులకు సెలవే ఉంటుంది. మొత్తంగా చూస్తే ఈ నాలుగు రోజుల్లో మూడు రోజులు దేశవ్యాప్తంగా బ్యాంకులు బంద్ ఉంటాయి. వరుసగా నాలుగు రోజులు హాలిడేస్ కోసం చాలా మంది బ్యాంక్ ఉద్యోగులు సోమవారం ఆగస్టు 14న కూడా సెలవు పెట్టే అవకాశం ఉంది. ఇలా సెలవులు పెట్టినట్లయితే, సిబ్బంది కొరతతో ఆ రోజున కూడా బ్యాంకు సేవలు అరకొరగానే అందుతాయని తెలుసుకోవాలి. అంటే దాదాపుగా 4 రోజులు బ్యాంకులు మూసి ఉన్నట్లే లెక్క.

మరోవైపు.. ఆగస్టు 12 రెండో శనివారం నుంచి ఈ నెలాఖరు వరకు చూసుకుంటే బ్యాంకులకు మొత్తం 12 రోజులు సెలవులు ఉన్నాయి. రెండో, నాలుగో శనివారాలు, ఆదివారాల్లో బ్యాంకులు సాధారణ సెలవులు ఉంటాయి. అలాగే ఇతర పండగలు, కార్యక్రమాల్లోనూ సెలవులు ఉంటాయి. అయితే, బ్యాంకు సెలవులు రాష్ట్రాలను బట్టి మారుతుంటాయి. కొన్ని రాష్ట్రాల్లో సెలవులు ఉంటే కొన్ని రాష్ట్రాల్లో బ్యాంకులు పని చేస్తాయి. రిజర్వ్ బ్యాంక్ ఆఫ్ ఇండియా బ్యాంక్ సెలవులను మూడు కేటగిరీల కింద వర్గీకరించింది. హాలిడేస్ అండ్ నెగోషియబుల్ ఇన్‌స్ట్రూమెంట్స్ యాక్ట్, రియల్ టైమ్ గ్రాస్ సెటిల్మెంట్ హాలిడేస్, క్లోజింగ్ ఆఫ్ అకౌంట్స్. ఈ బ్యాంకు సెలవు తీసుకున్నా ఈ మూడు కేటగిరీల్లోని ఒకదాని కిందకు వస్తుంది. అయితే, ప్రస్తుతం రోజుల్లో బ్యాంకులు మూసి ఉన్నా ఆన్‌లైన్, నెట్ బ్యాంకింగ్, యూపీఐ, ఏటీఎం సేవలు 24 గంటలూ పని చేస్తాయి. బ్యాంకు సెలవు రోజుల్లో నగదు విత్ డ్రా, డిపాజిట్ చేయాల్సి వస్తే ఏటీఎంను ఉపయోగించుకోవచ్చు.